Stipendioj Marjorie Boulton Anoncite
29 Junio 2021
DU JUNAJ ESPLORISTOJ RICEVIS STIPENDIOJN MARJORIE BOULTON
Guilherme Moreira Fians kaj Edwin Michielsen ricevis la Stipendiojn Marjorie Boulton de la jaro 2021, laŭ lastatempa anonco de ESF (Esperantic Studies Foundation).
Guilherme Moreira Fians (Brazilo) doktoriĝis pri socia antropologio en la Universitato de Manĉestro (Britio) en 2019, kaj estas nuntempe Lekciisto pri Antropologio en la Universitato de Brazilio. Li estas kunredaktoro de la revuo Esperantologio / Esperanto Studies kaj estrarano de la Centro de Esploro kaj Dokumentado pri Mondaj Lingvaj Problemoj (CED). Liaj nunaj esploroj estas bazitaj je la temo de lia doktora disertacio: etnografia studo pri la Esperanto-movado en Francio. La esploroj celas kompreni kiel lingvoj kaj ciferecaj komunikiloj havas efikon je la maniero laŭ kiu homoj evoluigas kaj plukomunikas politikajn perspektivojn. “Mia projekto esploras kiel dekstremaj naciistoj mobilizas haketojn, ret-robotojn, lingvojn kaj aliajn diskursajn mekanismojn por igi retajn politikajn diskutojn pli dinamikaj kaj, samtempe, pli konfrontaj,” klarigis d-ro Fians. “Mi esploros tiujn temojn el originala perspektivo kiu klarigos la manifestiĝojn de tiuj fenomenoj trans landlimojn, kun fokuso je brazilaj Esperanto-parolantoj.”
Edwin Michielsen (Nederlando kaj Kanado) posedas bakalaŭran kaj magistran diplomojn pri japanaj studoj de la Universitato de Leiden, kaj lastatempe (2021) doktoriĝis ĉe la Universitato de Toronto per disertacio pri “Proletaj artoj kaj internaciismo en Orienta Azio.” Li rolis kiel gastesploristo en la Universitato Ŭaseda kaj kiel Juna Gasta Esploristo en Seula Nacia Universitato, kaj faris pliajn esplorojn en Ĉinio (Universitato Tsinghua) kaj Japanio (Tokia Universitato). Lia Stipendio Marjorie Boulton ebligos plian viziton al Ŭaseda-Universitato kaj al la Japana Esperanto-Instituto por esplori pri la frua historio de Esperanto en Japanio kaj Ĉinio, kaj precipe pri la maniero laŭ kiu Esperanto estis utiligata de proletaj verkistoj en la unua duono de la dudeka jarcento por konstrui tutmondan lingvan solidarecon kontraŭ imperiaj lingvoj kaj lingva subpremo.
La Stipendioj Boulton estas tiel titolitaj memore al Marjorie Boulton (1924-2017), eminenta poeto kaj esploristo pri Esperanto tra multaj jaroj, bone konata ankaŭ kiel edukisto kaj esploristo pri anglaj lingvo kaj literaturo. Aŭtoro de serio de ok enkondukaj libroj pri literaturo ekde The Anatomy of Poetry (1953), d-rino Boulton verkis ankaŭ la norman biografion de la fondinto de Esperanto, L.L. Zamenhof, en du eldonoj – angla kaj Esperanta. En Esperanto ŝi verkis originalajn poemojn, eseojn kaj teatraĵojn. Ŝi havis doktoran diplomon de la Oksforda Universitato kaj estis membro de la Akademio de Esperanto.
“Ni ĝojas povi helpi tiujn du junajn fakulojn en ilia ekzamenado de la maniero laŭ kiu la movado por la Internacia Lingvo Esperanto interrilatiĝas kun pli vastaj politikaj kaj lingvaj fortoj,” komentis Charles O. Mays, ĉefdirektoro de Esperantic Studies Foundation. “Ni sentas nin honorataj, ke ni povas bonvenigi ilin en la esploran komunumon de ESF.”
Students at Poznan Interlinguistics Program (photo: Ilona Koutny)
Kun granda plezuro, mi ŝatus anonci ke la rezultoj de mia lasta antropologia esploro pri Esperanto estis publikigita libroforme!
Se vi volas scii pli pri kial anarkiistoj kaj komunistoj en Francio lernas Esperanton por diskuti politikon internacie aŭ pri kiel junuloj ligas lingvan justecon kun libera programaro - tio libro estas por vi!
Mi ne hezitas subteni ESF, ĉar por mi tiu fondaĵo estas la plej grava kaj efika por disvastigi kaj akceptigi Esperanton. Sufiĉas konsideri la diversajn aktivecojn, kiujn subtenas ESF, por kompreni ke la mono donita al tiu fondaĵo estas bonege uzata kaj donas konkretajn kaj utilajn fruktojn.
(Trefflé Mercier, Kanado)
Mi donacas al ESF, ĉar mi konsentas kaj fidas je la realigata laboro. ESF tenas kaj subtenas kelkajn el la plej gravaj spacoj por Esperanto en la reto, ĉiam kun moderna rigardo kaj entuziasmigaj rezultoj.
(Fernando Maia Jr., Brazilo)