Stipendioj Marjorie Boulton Anoncite
1 julio 2024
Esplorstipendioj Marjorie Boulton al:
- Hiba Ibrahim, York University.
- Vito Miao, Northern Arizona University.
Hiba Ibrahim estas doktoriĝa kandidato en aplikata lingvistiko en York University (Toronto, Kanado). Ŝia doktora esplorado ekzamenas spertojn pri interkultura kompetento (IK) de universitatnivelaj lernantoj de la angla lingvo, kadre de virtualaj interŝanĝoj inter Kanado kaj Jordanio. Per siaj esploroj, Hiba esperas riĉigi ĝisnunajn supozojn—esplorajn kaj praktikajn—pri la epistemologio de IK en virtualaj interŝanĝoj, alportante pliajn perspektivojn kaj spertojn pri kulturo kaj interkultura kompetento de lernantoj en ĉi tiu medio. Aliaj esplorinteresoj de Hiba inkluzivas la interrilaton de lingvo, kulturo kaj identeco, kaj lingvolernadon helpe de teknologio.
Hiba estas palestina jordaniano kiu kreskis en Amano, Jordanio. Ŝi gajnis sian bakalaŭron pri la angla lingvo kaj literaturo en 2009 de la Universitato de Jordanio kaj magistriĝis pri edukado en 2018 ĉe University College London. Kiel akademia esploristo kaj lingvo-edukisto, Hiba pasigis la lastajn 16-plus jarojn okupiĝante pri interkultura kompetento kaj mond-perspektiva edukado en diversaj kuntekstoj, inkluzive de la rilatoj inter komunumoj de gastigantoj kaj rifuĝintoj en Jordanio. Ŝi krome laboris pri la planado de studprogramoj kaj la trejnado de instruistoj sur la kampoj de perreta edukado kaj virtualaj interŝanĝoj en regionoj de Mez-Oriento kaj Nord-Afriko kaj en Nord-Ameriko. Aldone al siaj esploroj, Hiba plenumas diversajn rolojn per kiuj ŝi helpas antaŭenigi malkoloniajn alirojn kaj socian justecon kadre de perteknologia lingvolernado kaj la esplorado kaj praktikado de IK. Ŝi ankaŭ rolis kiel vizitanta Fulbright-stipendiulo ĉe Baldwin Wallace University en 2013, instruante la araban lingvon. Hiba esperas fini sian diplomon ĝis la vintro de 2025. Ŝi intencas daŭrigi sian karieron kiel akademiano pri lingvo-edukado kaj interkultura edukado kaj fari pliajn esplorprojektojn sur siaj kampoj de intereso.
Yongzhi Miao (Vito Miao) ricevis bakalaŭron pri altnivelaj tradukistaj studoj de Guangdong University of Foreign Studies, inkluzive de eksterlanda studjaro por studi literaturon ĉe la Universitato de Kalifornio, Berklio. Li sekve magistriĝis pri aplikata lingvistiko kaj dualingva alproprigo ĉe la Universitato de Oksfordo. Vito estas nuntempe en la kvara jaro de siaj doktoriĝaj studoj pri aplikata lingvistiko en la fako pri la angla lingvo ĉe la Universitato de Norda Arizono.
Liaj esplorinteresoj inkluzivas aplikatan lingvistikon (ekz. aŭskultado/parolado, la Tutmonda Angla, instruado de la angla kiel dua aŭ aldona lingvo (TESOL)), socian psikologion (ekz. la formado kaj modifado de sintenoj), kaj socian justecon (ekz. edukaj intervenoj). Liaj artikoloj aperis en fake kontrolataj revuoj kiel ekzemple TESOL Quarterly, Language Testing, System, Studies in Second Language Learning and Teaching, kaj Journal of Multilingual and Multicultural Development.
Li faris multajn konferencajn prezentojn, inkluzive de invitita fakgrupa prelego ĉe la internacia TESOL-kongreso en 2024 pri internaciaj variantoj de la angla kadre de klasĉambra instruado. Liaj esploroj estis ekstere rekonitaj per lia akcepto en la TESOL-programon por Mentorado de Gvidantoj, kaj lia inkluzivo en la fina rondo de kandidatoj por la premio por Frukarieraj Esploristoj de la fakrevuo System en 2023. La Stipendio Marjorie Boulton tre dankinde subtenos lian doktoran disertaĵon pri la efiko de intervenoj, planitaj surbaze de socia psikologio kaj esploroj pri variantoj de la Tutmonda Angla, al la kapablo de lernantoj de la angla aŭskulte percepti kaj kompreni diversajn prononcojn kaj parolformojn.
La Boulton-Stipendioj subtenas esplorojn en ĉiuj kampoj de la homsciencoj kaj sociaj sciencoj, precipe en rilato al interlingvistiko, lingva justeco, interkultura komunikado, Esperanto kaj parencaj fenomenoj. La Stipendioj celas omaĝi la kontribuojn de la forpasinta D-ino Marjorie Boulton, fekunda aŭtoro de teatraĵoj, poemoj kaj prozo en Esperanto, kiu ankaŭ verkis la ĉefan anglalingvan biografion de L. L. Zamenhof. Antaŭaj stipendiuloj inkluzivas la postdoktoriĝajn esploristojn Edwin Michielsen (nun ĉe la Universitato de Honkongo) kaj Guilherme Fians (nuntempe Leverhulme Research Fellow ĉe la Universitato de St. Andrews), Magdalena Madany-Saa, kiu lastatempe defendis sian disertacion ĉe Pensilvania Ŝtata Universitato, Usono kaj Cecilia Gialdini, postdoktoriĝa esploristo ĉe Ulstera Universitato.
Students at Poznan Interlinguistics Program (photo: Ilona Koutny)
Mi ne hezitas subteni ESF, ĉar por mi tiu fondaĵo estas la plej grava kaj efika por disvastigi kaj akceptigi Esperanton. Sufiĉas konsideri la diversajn aktivecojn, kiujn subtenas ESF, por kompreni ke la mono donita al tiu fondaĵo estas bonege uzata kaj donas konkretajn kaj utilajn fruktojn.
(Trefflé Mercier, Kanado)
Mi donacas al ESF, ĉar mi konsentas kaj fidas je la realigata laboro. ESF tenas kaj subtenas kelkajn el la plej gravaj spacoj por Esperanto en la reto, ĉiam kun moderna rigardo kaj entuziasmigaj rezultoj.
(Fernando Maia Jr., Brazilo)